மிக விரைவில் சித்தன் கொட்டில் புதிய வடிவில்!!

Wednesday, December 19, 2007

எமது புகலிட அரசியல் இலக்கிய வாழ்வில் நாம் அவர்களுடன் அல்லது எம்முடன் பயணித்த பலரை இன்று இழந்து நிற்கிறோம் ஒவ்வொருவருடைய இறப்பும் எம்மை பலவீனப்படுத்தி ,பலப்படுத்திச் செல்கிறது. பரா மாஸ்டரின் இறப்பு எமக்கு எதிர்பார்க்காத ஒன்று; முன்புபோல் அடிக்கடி சந்திக்க முடியாதுபோனதன் வேதனையை இவருடைய இழப்பிலும் உணரமுடிகிறது. ஓராண்டிற்குமுன் சந்தித்தபோது நலமாக இருந்தார் .கடைசிவரைக்கும் அரசியல் ,இலக்கியமென்று இயங்கிக்கொண்டிருந்தவர்; திடீரென்று எம்மை விட்டு பிரிந்தது நம்பமுடியாத வேதனை. எல்லா வயதினருடனும் நண்பராக பழகுபவர்; எல்லாவிடயங்களையும் ரசித்து, தானும் ஒருவராக கலந்து கொள்ளக்கூடிய கலை உணர்வுள்ள ஒரு கலைஞனை; இனிய மனிதரை இழந்து நிற்கிறோம், எப்போதும் எல்லாவற்றிலும் இவரின் பலமாக இருந்த மல்லிகா அன்ரி, சந்தூஸ், உமா, முரளி மற்றும் உறவினர்களுடனும் எம் துயரைப் பகிர்ந்துகொள்கிறோம் . அவரின் சிரித்தமுகம் என் கண்முன்னே தோன்றி மறைகிறது.
றஞ்சினி,Frankfurt
++++++++++++++++++++++
நினைவைத் தாக்கிய செய்தி

ஊடறு

புகலிடத்தில் நம் எல்லோராலும் பரா அங்கிள், பரா மாஸ்ரர் என அன்பாக அழைக்கப்பட்டு வந்த தோழர் பரா அவர்கள் (பரராஜசிங்கம்) நேற்றிரவு (16.12.07) திடீரெனக் காலமானார்.
அவரின் பிறந்த தினத்தன்றே மரணமும் அவரைத் தழுவிக்கொண்டது. இலக்கியச் சந்திப்பின் ஆரம்பகர்த்தாவும் இலக்கியச்சந்திப்பு நிகழ்வுகளின் முன்னோடியும் சிந்தனை சஞ்சிகையின் ஆசிரியரும் இடதுசாரி அரசியலாளருமாகப் பல பரிமாணங்களில் செயற்பட்ட அவருக்கு வயது 73. இவர் ஜேர்மனியிலுள்ள ஸ்டுட்கார்ட், பேர்லின் நகரங்களில் தனது புகலிட வாழ்வை மேற்கொண்டு வந்தவர். இடதுசாரியச் சிந்தனை கொண்ட இவர் இலங்கையில் பல தொழிற் கட்சிகளின் வேலைத்திட்டங்களிலும், அதன் போராட்டங்களிலும் பங்குபற்றியவர்.
தோழர் பரா அவர்கள் புகலிட இலக்கியத்துறையில் மட்டுமல்ல மாற்று அரசியலிலும், தலித்தியத்திலும் ஈடுபாடுகொண்டவராக இருந்தார். அத்தோடு அவர் மனிதஉரிமைகள் மீதான அக்கறை கொண்டவராக இருந்ததோடு, மனிதஉரிமை மீறல் சம்பவங்களை அவ்வப்போது பரவலாக்கி வெளிச்சத்துக்குக் கொண்டுவருவதை ஓய்வில்லாது செய்துவந்தவர். சாதிய மேலாதிக்க ஒடுக்குமுறைக்கெதிராகவும் போராடிவந்தவர். கடந்த ஒக்டோபர் மாதம் பிரான்சில் நடைபெற்ற தலித் மாநாட்டின் நிகழ்ச்சியில் பங்குபற்றி தனது ஆய்வுரையை வழங்கியிருந்தார். இதுவே அவர் கடைசியாகப் பங்குகொண்ட பொது நிகழ்ச்சியாக அமைந்துவிட்டது.
இவர் மல்லிகாவின் கணவரும், உமா, சந்தூஸ் ஆகியோரின் அன்புத்தந்தையுமாவார். குடும்ப வட்டத்துள் மட்டும் நின்றுகொள்ளாமல் இவர்கள் எல்லோரும் இந்த பொதுப்பரப்புகளில் செயற்பட்டதானது தோழர் பரா அவர்களின் உழைப்பின் மீதான நேர்மையைச் சொல்லிநிற்கிறது. அவரின் பிரிவு தரும் துயரில் இவர்களுடன் பங்குகொள்கிறது ஊடறு. அவருக்கு எமது கண்ணீர் அஞ்சலிகள்!

ஊடறு

0 Kommentare:

Post a Comment